Quen Somos

Milhulloa é unha pequena cooperativa galega que cultiva, transforma e comercializa plantas medicinais ecolóxicas desde hai máis de 20 anos.

Está formada por Chusa Expósito e Carmela Valiño, dúas mulleres con moito empuxe que teñen unha capacidade envexable de enfrontarse ás dificultades de forma creativa, e sempre dispostas a aprender e a colaborar con outros proxectos.

Ademais de cultivar, contan cunha planta de secado, que utilizan a unha temperatura moderada para conservar todos os principios activos e as propiedades de cada planta.

No proxecto inicial, a clientela principal ían ser os laboratorios. Con todo, tiveron que descartar esta opción polos baixos prezos. Cando asumiron o envasado e a distribución, apostaron polas tendas de proximidade e o quilómetro cero como parte da súa filosofía de desenvolvemento local e sostible, descartando a distribución en grandes superficies.

Nos últimos anos lanzaron unha liña de produtos de cosmética ecolóxica, en intercooperación con Granxa Maruxa, que produce leite ecolóxico e está situada na súa mesma comarca. Para esta nova aventura empresarial obtiveron financiamento a través de crowfunding, coa pre-venda dos seus produtos.

O proxecto de Milhulloa é un referente no ámbito dos emprendementos de mulleres no medio rural e cunha aposta clara pola sustentabilidade.

Milhulloa optou pola fórmula de cooperativa de traballo asociado, un modelo de base democrática e igualitaria. O feito de levar adiante o proxecto desde a filosofía da cooperación e como un proxecto colectivo axudoulles a sosterse.

Por exemplo, no que respecta á motivación, comprobaron que cando unha decae, a outra tira e así van avanzando. “Eu se estivese soa, derrubaríame. Tanto entre nós mesmas como con outras produtoras, unidas volvémonos moi creativas ante cada dificultade”, trasládanos
Carmela.

Milhulloa é un cooperativa auto-construída a medida, como unha alternativa laboral no medio rural. Non só proporciona ás súas socias un medio de vida, senón que o fai dentro do campo profesional no que Carmela e Chusa querían desenvolverse, os ámbitos da bioloxía e a farmacia, que foron os seus espazos de formación universitaria.

O proxecto tamén responde a outros obxectivos non económicos, entre outros:
• A súa aposta pola sustentabilidade ambiental, incluíndo a recuperación de especies botánicas en perigo de extinción.
• A posta en valor das plantas medicinais como patrimonio material e inmaterial das súas nais e avoas.
• A procura de condicións de traballo compatibles con outros ámbitos da vida.
• A construción dun modelo económico transformador, baseado en fórmulas cooperativas.
• O traballo en rede, con outros proxectos rurais e coa economía social galega, buscando provedoras e alianzas con outros proxectos que tamén comparten os seus valores.

Ademais das terras de cultivo, que son 10 hectáreas, contan cunha pequena industria, nunha nave dividida en catro espazos: unha sala de selección, unha cámara de secado, unha sala aséptica de envasado e unha oficina.

A cámara de secado ten capacidade para 150 ou 200 kg de planta aproximadamente. Funciona con enerxía eléctrica, polo que para optimizar os custos é conveniente enchela: isto inflúe no plan de traballo de colleita, xa que se fai nas quendas xustas para encher o secadeiro.

Para optimizar o investimento, complementan as plantas de primavera e verán, que son a maior parte das medicinais, coas plantas de inverno, como o grelo.

Dentro da fotografía actual de Milhulloa é necesario destacar a súa permanente orientación a traballar en rede.

O seu secadoiro tamén foi construído con redes. Neste caso, redes de pesca. E esas redes simbolizan ben a súa orientación aberta e colaboradora:
• Desde o inicio, fixeron aceites aromatizados para o veciño balneario Río Pambre.
• Optimizan as súas instalacións secando algas e pementos doutros proxectos innovadores que tamén xorden no rural galego.
• Forman parte das redes de cooperativas e economía social. Xunto con outras 14 entidades, foron fundadoras da sección galega de Coop57, onde colaboran de forma activa. Tamén impulsaron a plataforma Ben Mercado, o marketplace da economía social e solidaria de Galicia e forman parte da cooperativa de consumo de enerxía renovable Nosa Enerxía.
• Constituíron a empresa Muuhlloa, para lanzar, xunto con Granxa Maruxa, unha liña de cosmética ecolóxica.
• Non desaproveitan ningunha oportunidade para apoiar a outros proxectos similares ao seu: por exemplo, cando a Televisión de Galicia fixo unha reportaxe polo seu 20 aniversario, realizaron unha demostración de cocción dos grelos deshidratados. E nela aproveitaron para dar publicidade aos produtos do cooperativa Tres Fuciños, de cría de porcos de raza autóctona, tamén con criterios de sustentabilidade ecolóxica.